18. 03. 26
posted by: cm

Mir befinde is in dr Pationszyt grad, und die het au fir die aint oder ander Passion ebbis parat.
Es isch e Zyt wo nid nur ganz eifach soll sy, doch schwingt au ganz viel Hoffnig immer mit drdry.

Es isch Unihockey Playoff Zyt. Ok, i spiel in dr Regel sälber nid so guet, as es mi irgendwo in de Playoff bruche tuet.
Aber was wär Unihockey, im Niveau vo dr nationale Spitze, wenn niemer uf de Räng dät sitze.
D Stimmig die wär zimmli Platt, und s Unihockey fir die aktive vermuetlig nur no halb so glatt.
Drum gits au allewyl so Deppe, wie mi, wo e Pauke oder Bongos mit in d Halle schleppe,
und anders als an andre Ort, gohts bi uns nid um Pyros und Lärm, nei s goht um e Sport.
S spielerisch Fyyrwärgg, das wird uf em Fäld nur zindet, will s schnälle und spannende Spiel so richtig Aklang findet.

>> Dr 7 Maa - e Unihockey-Märli in 4 bis 7 Sätz
18. 03. 26
posted by: cm

1. Satz

Jo, au as Basler Unihockeyfan hesch ainisch meh miesse erkenne, mir sin alli Sinder, ob mir schreie, schimpfe, kämpfe oder renne,
So isch s au mängem am Samstig vor em Palmsunntig in dr Sandgruebehalle, wo de maiste d Laistig vo de Schizrichte nid so het meege gfalle.
E mängg bees Wort isch vermuetlig gfalle, persee, will d Schiri vermuetlig die ainzige gsi sy, wo de ersti Penalty als solche hän gseh.
Klote het ne danggend versänggt, und d Basler hän sich nume no dänggt, nai, dä het ne doch tatsächlig das Schiriteam gschänggt.
Au bim zwaite Stroofstoos zue gunste vo Klote, hät me d Aktion au andersch könne uslote.
D Schris mache sich nid wirklig Frinde, wo si dr aint oder ander Schuss vo Basel als Pfosteträffer befinde.
Sigs wies well, was bringt s z lamentiere, bis zer Spielhälfti dien d Gest mit 4 Goal fiehre.

>> Herr, vergib ne, denn sie wüsse nid, was sy mache
18. 04. 03
posted by: cm

2. Satz

Jo, das het sich sicher nid nur Jesus gfrogt vor rund 2000 Johr,
so kunnt sich die Osterdaag au mängge Basler Unihockeyaner vor,
d Siegesgott het vermeintlig am Karsamstig Basel Regio verloo,
jedefalls het s nid selle sy und isch so, wie s het miesse ko.

In dr guet gfillte Klotner Hockeyhalle, s isch famos,
lege die zahlrich mitgreiste Basler Fans so richtig los.
Und nach em schnälle 1:0 vo de Klotener Jets,
zapplet gli scho dr Basler Usglich im Netz.

Und no vor dr erste Dritteslpause,
stiegt bi de Basler Fan e Sause,
e Spiele vo de Klote Jets verschuldet e Stroofstoos,
de Patrick Mendelin trifft, d Freud isch riesegross.

>>Mi Gott, worum hesch mi verloh?
18. 04. 03
posted by: cm

3. Satz

Nid immer het me alles in de aigne Händ und Bei,
au as Basler Unihockeyaner zellt nid de Sieg ellei,
was au iber Ostere sich wieder zeigt het ob z Klote oder ir Sandgruebe,
d Basler Unihockey Region stoht gschlosse hinter de Basel Regio Buebe.

Und die Manne, das bliebt und stoht au fest am Änd,
jo die häns au hit no i de eigne Bei und einge Händ.
S dritte Spiel wieder in Basel isch denn au meh e Kampf,
d Klotener Jets mache langsam immer meh und meh Dampf.

Doch bliebt s erste Drittel gar ohni uf beide Site,
ersch im zweite während 2 Stroofe geg Basel, unbetstirte,
klingt de Gäst de Fiehrigsträffer bi finf gäge drey,
doch Basel dräits im dritte Drittel, spiel startet ney.

>>Vater, i befiehl mi Gaist i dini Händ