Herr, vergib ne, denn sie wüsse nid, was sy mache

18. 03. 26
posted by: cm

1. Satz

Jo, au as Basler Unihockeyfan hesch ainisch meh miesse erkenne, mir sin alli Sinder, ob mir schreie, schimpfe, kämpfe oder renne,
So isch s au mängem am Samstig vor em Palmsunntig in dr Sandgruebehalle, wo de maiste d Laistig vo de Schizrichte nid so het meege gfalle.
E mängg bees Wort isch vermuetlig gfalle, persee, will d Schiri vermuetlig die ainzige gsi sy, wo de ersti Penalty als solche hän gseh.
Klote het ne danggend versänggt, und d Basler hän sich nume no dänggt, nai, dä het ne doch tatsächlig das Schiriteam gschänggt.
Au bim zwaite Stroofstoos zue gunste vo Klote, hät me d Aktion au andersch könne uslote.
D Schris mache sich nid wirklig Frinde, wo si dr aint oder ander Schuss vo Basel als Pfosteträffer befinde.
Sigs wies well, was bringt s z lamentiere, bis zer Spielhälfti dien d Gest mit 4 Goal fiehre.

Doch i drei Minute gnau ir Mitti vom Spiel, hejo, gsesch d Basler bis uf 3:4 anecho.
"Kämpfe Basel" ghörsch es schreie, das usglichsgool muess doch au grad no gheie.
Doch Klote rapplet sich nomol uf, schiesst in Unterzahl s 5ti Goal und s 6te au gli druf.
Nach 2 Drittel liege d Gest wieder mit 3 Goal vorus, doch z Basel isch im letschte Drittel no lang nid schluss.
E Stroof geg Klote kurz vor Drittelsänd lost Basel hoffe, doch au in dr Überzahl zum Start vom Schlussdrittel het no kain me troffe.
Druf folgt e Stroof gege Basel gli, isch es das jetz in Unterzahl scho gsy?
Nai, meint do dr Tim im Goal, unsere Held, und gseht as dr Carlo wie e Wildi nach vorne schnellt,
wirft dä Ball mit aller Kraft direkt in däm sin Lauf, dä schnappt en sich ziet nach inne und dängt sich "hau drauf",
und er verrumt en ganz yyskallt, jetz hets au jede uf dr Tribüni gschnallt.

E Sensation ligt in dr Luft, jetz bruchts jede Maa, es schreit jede ainzel so lut er ka.
Mr schleen uf d Bongos, schreie und dien Fahne schwinge, dä usglich muess doch jetz no glinge.
Nach 54 Minute und 12 Sekunde, d Stimmig bi Klote isch uf em Tiefpunkt unde,
schaft Basel treibe vom 7 Maa uf de Räng, dr Usglich und kunnt ersch richtig in d Gäng.
Weder Klote no ds Haimteam vermag drno, nomol ainisch vor em Drittelsänd in Fiehrig z goh.

In dr Verlängerig wirds Spiel drum entschiide, d Närve vo de Fän mien wyter liide.
Jänu, am Palmsunntig dien mir in dr Kirche halt mol nid mit singe, mir wänn alles gä zem d Hoffnig uf das Spielfäld bringe.
Und am Änd es muess so cho, das isch s Best, Gott sei dank hän mir Basler au no en Est.
Nach 4 Minute und 28 Sekunde kämpfe, schreie, fahne schwinge, duet em Tanel de Siegträffer glinge.
So fallt s is lichter, mr vergän au de Schri, däne zwei, und hoff au sy vergän is unser gschrei.

Drum verblybe mir, chli stolz, es isch is eh Ehr, als eure 7te Maa, und sin bereit vellicht chunt jo no mehr...

Matchtelegramm uf swissunihockey.ch