Mi Gott, worum hesch mi verloh?

18. 04. 03
posted by: cm

2. Satz

Jo, das het sich sicher nid nur Jesus gfrogt vor rund 2000 Johr,
so kunnt sich die Osterdaag au mängge Basler Unihockeyaner vor,
d Siegesgott het vermeintlig am Karsamstig Basel Regio verloo,
jedefalls het s nid selle sy und isch so, wie s het miesse ko.

In dr guet gfillte Klotner Hockeyhalle, s isch famos,
lege die zahlrich mitgreiste Basler Fans so richtig los.
Und nach em schnälle 1:0 vo de Klotener Jets,
zapplet gli scho dr Basler Usglich im Netz.

Und no vor dr erste Dritteslpause,
stiegt bi de Basler Fan e Sause,
e Spiele vo de Klote Jets verschuldet e Stroofstoos,
de Patrick Mendelin trifft, d Freud isch riesegross.

Doch e unnötigi und klainlig pfiffni Stroof wäge Spielverzögerig geg de Basler Goalie,
und ere wytere geg de Mikko Jolma fir e Stockschlag, folgt de Usglich in Unterzahl gli.
Wyter passiert im Mitteldrittel nyt me bsunders erwähnenswärts,
doch im Schlussdrittel gohts für Basel zersch wieder vorwärts.

Nach 50 gspielte minute liegt Basel Regio abermals in Front,
sogar mit 2 Goal vorus, fir d Fans het sich die Reis glohnt,
doch drno het d Basler schinbar d Kraft e kli verloh,
und d Klotener Jets sin drno meh u meh besser ufkoh.

Si schaffe nid nur de Aschlussdräffer so,
dr Usglich folgt scho gli denn au drno,
und als ob das nid scho gnueg wär gsi,
kunnt au no de Fiehrigsträffer hintedri.

Und wie kennts au andersch sy drno zem Schluss,
bi Basel isch zwar nid d Luft aber de Goaie duss,
und Klote schiesst uf s leere Netz, dr Ball gheit irgendwie ine,
s Spiel isch drmit entschiede, aber d Basler mien glich nid grine.

Denn sy hän kämpft und sich tyyr verkauft, dr 7ti Maa wird se so schnäll nid verloh,
Nei, all die zahlrich mitgreiste Lyt wärde au wyter bedingigslos hinter eych stoh.