Vater, i befiehl mi Gaist i dini Händ

18. 04. 03
posted by: cm

3. Satz

Nid immer het me alles in de aigne Händ und Bei,
au as Basler Unihockeyaner zellt nid de Sieg ellei,
was au iber Ostere sich wieder zeigt het ob z Klote oder ir Sandgruebe,
d Basler Unihockey Region stoht gschlosse hinter de Basel Regio Buebe.

Und die Manne, das bliebt und stoht au fest am Änd,
jo die häns au hit no i de eigne Bei und einge Händ.
S dritte Spiel wieder in Basel isch denn au meh e Kampf,
d Klotener Jets mache langsam immer meh und meh Dampf.

Doch bliebt s erste Drittel gar ohni uf beide Site,
ersch im zweite während 2 Stroofe geg Basel, unbetstirte,
klingt de Gäst de Fiehrigsträffer bi finf gäge drey,
doch Basel dräits im dritte Drittel, spiel startet ney.

Basel fiehrt gli mit 2:1, d Halle freyts, sy isch wieder proppe voll,
doch d Klotner meege wieder usgliche und in fiehrig go, si findes toll.
Und wo denn s Goal vo Basel im letschte ufbäume wieder isch verwaist,
glingt Klote erneut e Träffer, und me weiss wie au hit dr Sieger haisst.

Doch ebbe, Erfolg isch nid alles im Läbe, s goht um viel Meh,
drum het is gfreut hän mir kenne de Beni Lüthi z Basel gseh,
vom Verein "Unihockey fir Stroosekinder" isch er z Gast ko,
und vo de 597 Bsuecher het er sicher au no e paar Spände mitgnoh.

Wie Basel Regio bi uns i de Region duet repräsentiere,
duet dä Verein wältwyt in Unihockey-Förderig investiere.
Zwei Klotner Spieler dien für das Projäggt gar uf Afrika mit goh,
aber vorhär wär no glatt, wenn d Basler sy no wurde e paar mol schlo.

Aber es bliebt is oft, und das isch au guet, am Änd,
nur z erkenne, s liegt nid immer alles in unsere Händ.
Mir kenne nur Danke für das wo mir bis jetzt hän erreiche derfe, uf das wo no kunnt derfe mir hoffe,
Mir kenne alles gäh und wyter dra glaube, derfe alles in dini Händ lege... und wer weiss, no isch alles offe!