Baselbieter Tradition - me isch gege jeglichi Art vo Fusion

19. 02. 12
posted by: Christian Muhmenthaler

E Schnitzelbangg(versuech) zur kantonale Spitalfusionsinitiative wo in Baselland am 10.02.2019 sogar agnoh worde wär, aber im Stadtkanton gschitteret isch

Es isch e mol e Tradition ganz schlichend still gebore worde,
vo Schönebuech bis Amel, vo Roggeburg bis hoch in unsre Norde.

Agfange het alles vor viile viele Johr, do gän sich e paar eis uf de Ranze,
hejo, s sin die rote und die schwarze Gartezwärg, dert unde an dr Hülfteschanze.

Und me könnt meine dä zwist isch bis hüt no nid ganz verpufft,
es herrschi immer no e chlini oder mängisch au grösseri Kluft,
ersch chli meh as hundert Joor drno,
dien plötzlig alli zämme für e Sach yystoh:

Denn es hän e paar ganz e grossi Vision
si wänn ufstelle z Kaiseraugst e Energiebastion
doch die ganz Region gseht d gfohr vo ere Fusion
so e Atomari, oder susch e so e Gau,
und denn isch meh as unseri Region zur Sau.

Und wo s denn wieder e paar Joor drno
zu ere wiedervereinende Fusion soll ko
dert isch schnäll klar, das goht jo nid
bis so Fusione, do mache vieli nid gärn mit.

Do fliesst denn meini au no viel Wasser durab dur de Bach,
und drmit no mänggi gueti oder weniger gueti politischi Sach.

So will me jetz zem einigi Koste zspaare,
und gsundheitlig für alli besser z fahre,
us eme Iberagebot e gsund Netz a Spitäler ufstelle,
und so e Versorgig wo mr az in Zuekunft druf ka zelle.

Doch ebbe das isch jo bi uns scho lang Tradition,
mr wei mol luege, heisst mr si gege jegligi Fusion.

Doch es isch halt so mit dene Traditione,
nid fir alli duet sich s erhalte au lohne.
Will Gsundheit nid sälbstverständlig isch,
muess jetz e gsundi Lösig äntlig uf de Tisch.

Und bi allem drfür und drwider, muess e jede gseh,
au ohni Spitalfusion wärde d Koste Joor um Joor meh.
Drum sin mir vo dr EVP für e gsunds Gsundheitswäse us Tradition
Und emfähle drum, wie kennts andersch sy, Jo zu dr Spitalfusion!